ЗНАМ останува со „куси ракави“ на локалните избори?
Според неофицијални информации на ТВ 24, владејачката ВМРО-ДПМНЕ најверојатно ќе го поддржи својот коалициски партнер ЗНАМ само во две големи општини, Центар и Куманово, додека за Старо Нагоричане одлуката сè уште не е донесена. Оваа информација, добиена од висок партиски функционер на ВМРО-ДПМНЕ, се очекува да биде официјализирана на вечерашниот состанок на партијата.
Според сознанијата на ТВ 24, иако ЗНАМ инсистирале на поддршка и во неколку помали општини како Валандово, Крушево и Дојран, внатрепартиските анкети на ВМРО-ДПМНЕ покажале дека кандидатите на Мицкоски се во предност пред можните кандидати на Димитриевски. Токму поради тоа, се очекува вечерва ВМРО-ДПМНЕ да го промовира сопствениот кандидат за градоначалник на Валандово. Освен за Валандово, се очекува Мицкоски да ги објави и кандидатите за Кичево и Струмица. Во Кичево, довербата повторно ќе ја добие лекарот Александар Јовановски, додека во Струмица, боите на партијата неофицијално ќе ги брани гинекологот Никола Маџунков.
ТВ 24 го контактирала и коалицискиот партнер ЗНАМ, од каде што кратко изјавиле дека ќе го почекаат исходот од вечерашниот состанок на Извршниот и Централниот комитет на ВМРО-ДПМНЕ пред да коментираат.
„Најпрвин ќе почекаме да видиме каков ќе биде исходот од вечерашниот И.К и Ц.К на ВМРО ДПМНЕ па потоа деновите и ние ќе ги свикаме органите на нашата партија односно нашиот Извршен и Централен за да видиме како ќе продолжиме понатаму и дали ќе номинираме или не свои кандидати за други општини“.
За разлика од ограничената поддршка за ЗНАМ, Христијан Мицкоски се очекува да ги поддржи кандидатите на коалицијата Вреди во повеќе општини, како Тетово, Гостивар, Струга, Чаир, Арачиново, Дебар и други помали општини со доминантно албанско население.
Во меѓувреме, владината коалиција сè уште не го објавила кандидатот за Кочани, а Мицкоски изјавил дека анкетите се во тек и дека сите кандидати ќе бидат официјализирани до законскиот рок на 12 септември.
