Пациентите со канцер бараат казни за доцнењето на лековите; Лекарите алармираат: Меланом се појавува и на 20 години
Пациентите со канцер бараат воведување одговорност и казни за ненавремено распишување на тендери и доцнење на терапиите, порачувајќи дека не можат повеќе да прифатат „технички и административни причини“ како изговор за загрозување на нивното здравје. Во исто време, здравствените работници алармираат за сè поголем број заболени, а особено загрижува што старосната граница драстично се намалува.
Од здруженијата на пациенти нагласуваат дека иако дел од терапиите се достапни, останува проблемот со тендерите на кои не се јавуваат понудувачи, што остава дел од пациентите без неопходните лекови.
На денешните дискусии, и пациентите и здравствените работници го ставија фокусот врз меланомот, најагресивниот карцином на кожата. Лекарите апелираат дека раната дијагностика е клучна, но подеднакво е важно и брзото добивање на резултатите за да може навреме да се почне со третман.
Иако проблемот со недостаток на реагенси на Институтот за патологија е надминат, лекарите се соочуваат со нов, уште поголем предизвик.
„Бројот на пациенти со канцер, за жал, постојано расте, но она што нè загрижува е што старосната граница се намалува. Денес имаме пациенти со дијагностициран меланом на 20-годишна возраст“, предупредуваат здравствените работници.
Освен специфичните проблеми со дијагностиката и терапиите, како горлив проблем за целиот здравствен систем останува и несразмерот меѓу сè поголемиот број пациенти со канцер и малиот број лекари специјалисти кои треба да се грижат за нив.
