ЗНАМ: Одлуката на Цеков не е изненадување, човек кој јавно се залагаше за внесување на Бугарите во Уставот, природно е што повеќе не се препознава во партијата
Од политичката партија ЗНАМ попладнево реагираа по повод одлуката на пратеникот Миле Цеков да делува како независен во Собранието.
Како што велат, подолг период било јасно дека пратеникот Миле Цеков политички и вредносно се оддалечува од принципите, програмските определби и државотворната визија на Движењето ЗНАМ за Наша Македонија.
„Затоа, неговата одлука да ја напушти пратеничката група и да делува како независен пратеник не претставува изненадување.
Движењето ЗНАМ е создадено врз јасни принципи кои се темелат на чесност, одговорност, заштита на македонските национални интереси и борба за достоинствена и суверена Македонија. Тоа не се вредности од кои отстапуваме зависно од политичкиот момент, личните амбиции или дневнополитичките пресметки.
Оттука, неговите обиди денес да се претставува како симбол на принципиелност, а притоа претходно да застапува позиции спротивни на државните и националните црвени линии, се крајно несериозни и неубедливи пред граѓаните.
За човек кој јавно се залагаше за внесување на Бугарите во Уставот, природно е што повеќе не се препознава во политиките на Движењето ЗНАМ.
Причините за оваа одлука се лично негови. Дали станува збор за политички калкулации, клиентелизам или нешто друго,
ќе покаже времето.
Но, Движењето ЗНАМ нема да отстапи од својата мисија и од довербата што ја доби од народот.
На господинот Цеков му посакуваме успех во неговото понатамошно политичко делување како независен пратеник.
Движењето ЗНАМ за Наша Македонија останува цврсто определено кон политиките на национално достоинство, стабилност, реформи и силна македонска држава.
