Жителите на Водно со ултиматум: Блокади на улиците ако не се реши сообраќајната небезбедност
Жителите на скопската населба Водно упатија сериозно предупредување до надлежните институции. Доколку во рок од 7 дена не се преземат конкретни мерки за подобрување на безбедноста во сообраќајот, тие ќе ја блокираат фреквентната улица „Питу Гули“.
Најголема загриженост постои за безбедноста на учениците од основните училишта „Кочо Рацин“ и „Киро Глигоров“, кои секојдневно се изложени на висок ризик на патот до училиште. Според сведоштвата на граѓаните, на оваа локација веќе се случиле неколку сообраќајни незгоди во кои настрадале пешаци.
Граѓаните јавно ги прашуваат локалните власти зошто досега не е санкционирано нелегалното паркирање и зошто сè уште нема донесен Детален урбанистички план (ДУП) кој соодветно ќе го регулира сообраќајот во овој дел од градот.
„Да не чекаме да се случи трагедија – безбедноста на нашите деца мора да биде врвен приоритет“, децидни се жителите на Водно, најавувајќи мирни протести и блокади доколку нивните барања не бидат исполнети во најбрз можен рок.
