Жена лажела дека е бремена за да не ја убие масовниот убиец Урош Блажиќ

За да се спаси од масовниот убиец Урош Блажиќ, жена лажела дека е бремена. Жената која била во таксито што масовниот убиец  го киднапираше по масакрот во Младеновац денеска е сослушана во Вишото јавно обвинителство во Смедерево. Таа доби статус на оштетена, потврди обвинителот Иван Конатар за Еуроњуз Србија. Нејзиниот вереник исто така е испрашуван.

Предвидено е во наредните денови да даде исказ и таксистот кој го управувал возилото таа вечер, а Конатар рече дека се наложени голем број сложени вештачења, меѓу кои балистички, психијатриски и ДНК.

Како што неофицијално се дознава, жената пред обвинителството рекла дека откако Блажиќ го украл возилото, лажела дека е бремена затоа што се плашела дека може да ја убие. Убиецот неа и на таксистот им се заканувал со смрт. Обвинителството интензивно работи со полицијата на утврдување на потеклото на оружјето употребено и начинот на кој обвинетиот го набавил оружјето.

Блажиќ ноќта меѓу 4 и 5 мај со истрели од автоматска пушка уби осум лица, тешко и лесно рани 14 од нив, а по апсењето во обвинителството го призна делото.

Блажиќ се товари за пет кривични дела: тешко убиство, недозволено изработување, држење, носење и тргување со оружје и експлозивни материи, киднапирање и неовластено користење туѓо возило. Тој доби 30 дена притвор. Месецов имаше два масакри во Србија. Претходно, на 3 мај, 13 годишно момче изврши масакр во основното училиште „Владислав Рибникар“ каде учел. Во тој масакр настрадаа 10 луѓе.