Зголемен авионски сообраќај за време на изборниот викенд – 12 чартер летови на аеродромите во Охрид и Скопје
Според информациите на СДК.мк, за време на изборниот викенд, кога се одржуваше вториот круг од локалните избори, на аеродромите во Охрид и Скопје беше забележан значително зголемен авионски сообраќај, со вкупно 12 вонредни чартер летови.
Најголем дел од нив беа реализирани на охридскиот аеродром „Св. Апостол Павле“, каде во саботата, на 1 ноември, покрај редовните линии, слетаа шест дополнителни авиони. Два од нив биле од типот „Ербас А320“ со по 180 седишта од Базел, а четири „Ембраер 190“ со капацитет од 110 до 134 седишта пристигнале од Цирих.
Следниот ден, во неделата наутро, во Охрид биле реализирани уште два чартер лета – еден од Цирих и еден од Братислава.
На Меѓународниот аеродром Скопје во саботата пристигнале чартер летови од Цирих, Базел и Дортмунд, а во неделата и еден лет од Диселдорф. Капацитетот на авионите што слетале во главниот град се движел меѓу 110 и 180 седишта.
Како што пренесува СДК.мк, според видеа и објави на социјалните мрежи, голем дел од патниците биле иселеници по потекло од Струга и Кичево, двете општини во кои се гласаше во вториот круг од локалните избори.
Податоците на Државната изборна комисија покажуваат дека до 17:00 часот во Кичево излезноста изнесувала 48,29%, а во Струга 35,39%.
