Зеленски: Путин лаже за 30-дневниот прекин на огнот
Рускиот претседател Владимир Путин лаже кога вели дека 30-дневниот прекин на огнот предложен од Киев и Вашингтон е комплициран. Ова го изјави украинскиот претседател Володимир Зеленски , пренесе агенцијата Франс прес.
„Путин лаже дека прекинот на огнот е премногу комплициран. Во реалноста, сè може да се контролира и ние разговаравме за тоа со Американците“, рече Зеленски во „Ex“.
На прес-конференција во Киев, украинскиот претседател посочи дека територијалното прашање во војната е „комплексно“ и дека треба да се разговара детално подоцна. „САД го покренаа ова прашање на состанокот во Џеда. Тие го слушнаа украинскиот став. Нашиот став е дека под никакви околности не ги признаваме окупираните украински територии како руски“, рече Зеленски.
Зеленски ја обвини Москва дека ги одложува преговорите за 30-дневниот прекин на огнот предложен од Киев и Вашингтон за зајакнување на нејзините позиции на бојното поле. „Тие сакаат посилни позиции пред прекинот на огнот. Одложувањето на процесот е поврзано со фактот дека тие сакаат да ги подобрат своите позиции на бојното поле“, додаде тој.
Во меѓувреме, претседателот создаде делегација која ќе го води „преговарачкиот процес за постигнување праведен мир“ со Русија, се вели во декретот што денеска го објави Киев.
Според указот, шефот на претседателската администрација Андриј Јермак, министерот за надворешни работи Андриј Сибига, министерот за одбрана Рустем Умеров и заменик-шефот на претседателската администрација Павло Палиса ќе го формираат овој тим, кој ќе комуницира со меѓународните партнери на Украина.
Овие четворица официјални претставници ја сочинуваа украинската делегација на разговорите со САД, кои се одржаа оваа недела во Саудиска Арабија, а кои резултираа со предлог за 30-дневен прекин на огнот.
