Зеленски предлага размена на територија со Путин: Еве како изгледа неговата идеја
Украинскиот претседател Володимир Зеленски планира да и понуди на Русија директна размена на територии за ставање крај на тригодишната војна, доколку претседателот на Соединетите Американски Држави, Доналд Трамп успее да ги доведе двете земји на преговарачка маса.
„Ќе размениме една територија за друга“, рече Зеленски во интервју за „Гардијан“ објавено во вторник, наведувајќи дека Киев може да отстапи дел од регионот Курск, кој го освои за време на августовската ненадејна офанзива на руска територија.
На прашањето кои територии окупирани од Русија ќе ги побара Украина за возврат, Зеленски одби да прецизира: „Не знам, ќе видиме. Но, сите наши територии се важни, нема приоритети“, пренесува Политико.
Трамп постојано изјави дека планира наскоро да стави крај на руската војна против Украина и тврди дека веќе постигнал одреден напредок во разговорите со претседателот Владимир Путин. Според Трамп, рускиот лидер „сака војната да заврши и луѓето да престанат да умираат“, но неговиот тим признава дека двете страни ќе мора да жртвуваат нешто за да се постигне мир.
Во меѓувреме, Русија изврши неколку масовни напади со беспилотни летала против енергетската инфраструктура на Украина, продолжува да напредува во регионот Доњецк на истокот од земјата и не покажува волја за преговори.
„Во регионот Курск, неонацистите кои дејствуваат таму … контролираат област широка приближно два метри и длабока еден и пол метри“, напиша Марија Захарова, портпаролка на руското Министерство за надворешни работи, во објава на Телеграма во вторникот. „Зеленски дава такви изјави со цел да ги прикрие вистинските размери на катастрофата за вооружените сили на Украина на овој фронт.
Руските сили минатата година окупираа дополнителни 3.600 квадратни километри украинска територија и сега контролираат околу 20 отсто од земјата. Спротивно на тоа, украинските војници држат околу 500 квадратни километри во западниот дел на Курската област во Русија.
