Зеленски од Молдавија: „Кога ќе победиме, војната ќе престане“
Украинскиот претседател Володимир Зеленски пристигна на самитот на европските лидери во Молдавија, каде што беше пречекан од претседателката на земјата, Маја Санду, пренесува Ројтерс.
Тој повторно изрази уверување дека Украина ќе испадне победничка страна во воениот конфликт.
„ Кога ќе победиме, војната ќе престане “, најави Зеленски.
Тој и се заблагодари на Молдавија што ги прифати украинските бегалци откако Русија ја започна својата целосна инвазија. Според ОН, Молдавија им даде азил на над 700.000 бегалци од февруари 2022 година , а над 100.000 сè уште остануваат во земјата.
„Украина денес ја чува Молдавија безбедна и ние сме многу, многу благодарни за тоа“, рече Санду по краткиот разговор со Зеленски, чија земја се наоѓа меѓу поранешната советска република Молдавија и Русија.
Украинскиот лидер ги објави плановите за формирање на нови коалиции за да добие дополнителна одбранбена поддршка против руската агресија, за што сака да разговара со другите европски лидери.
Двајцата претседатели разговарале и за нивните аспирации за членство во Европската унија.
„Мислам дека ова е многу важно – нашата иднина во ЕУ“, нагласи Зеленски и увери дека Украина е подготвена да биде дел од НАТО.
Украина има статус на кандидат за ЕУ од минатото лето и се надева дека ќе започне официјални преговори за пристапување во блокот до крајот на годината.
