Запрен железничкиот сообраќај низ Германија
Германските железничари во средата започнаа тридневен штрајк поради спорот со националниот железнички оператор за платите и работното време, јавува Анадолија.
Државниот Дојче Бан рече дека штрајкот на синдикатот на машиновозачите на Германските железници (GDL) ќе предизвика голем прекин на меѓуградските, регионалните и приградските возови меѓу среда и петок.
„Возниот ред за итни случаи обезбедува само многу ограничени железнички услуги на меѓуградски, регионални и S-Bahn услуги. Ве молиме воздржете се од непотребни патувања за време на штрајкот и одложете го патувањето за друг пат“, беше соопштено.
„Повисоки плати и помалку работни часови“
Лидерот на синдикатот Клаус Везелски остро го критикуваше раководството на Дојче Бан и рече дека последната понуда на железничкиот оператор е „провокација“ и далеку од исполнување на нивните барања.
„Доколку нема нова понуда до петок, ќе направиме пауза и потоа ќе преземеме чекори за следниот штрајк“, изјави тој за јавната телевизија АРД, набргу откако машиновозачите престанаа со работа во средата наутро.
GDL инсистира на зголемување на платите од 555 евра (околу 600 долари) месечно и еднократна премија за да се компензира инфлацијата до 3.000 евра (околу 3.250 долари). Синдикатот бара и намалување на работното време на смените, од 38 на 35 часа неделно, без намалување на платите.
