Новинари низ Европа шпионирани од нов софтвер!
Двајца италијански новинари кои открија афери поврзани со владејачката партија на премиерката Џорџа Мелони биле мета на комерцијален шпионски софтвер произведен од израелска компанија, поддржана од САД. Според истрагата на канадската истражувачка група Citizen Lab, во Европа е идентификувана и трета жртва, но бројот на потенцијално следени лица и вистинскиот нарачател на шпионирањето остануваат непознати.
Прислушувани биле Чиро Пелегрино и Франческо Канчелато, уредници на истражувачкиот портал Fanpage.it, кој лани уфрли новинари во младинскиот подмладок на партијата на Мелони. Во снимените материјали, членовите на партијата даваа расистички и фашистички изјави.
Во април нивните телефони ги алармирале дека се под напад од платенички софтвер, по што уредниците ги доставиле уредите на анализа до Citizen Lab. Тие потврдиле дека се работи за Graphite, софтвер за шпионирање развиен од израелската компанија Paragon Solutions.
Graphite функционира слично на познатиот Pegasus – шпионира без акција од страна на корисникот, и има пристап до апликации како WhatsApp и Signal, вклучително и до шифрирани пораки. Компанијата Мета во јануари објави дека Graphite бил користен за компромитирање на 90 корисници во 20 земји – најмногу во Европа.
Италијанската влада, под притисок на јавноста и синдикатот на новинари, беше предмет на парламентарна истрага. Иако разузнавачките служби формално не го шпионирале Канчелато, истрагата утврди дека Graphite и слични алатки се користат „легално“ во случаи поврзани со националната безбедност и миграцијата.
Претседателот на италијанскиот новинарски синдикат FNSI, Виторио ди Трапани, изјави:
„Неприфатливо е во демократска земја новинарите да бидат шпионирани без јасни причини. Не знаеме колкумина се мета, а тоа е застрашувачко.“
