Започнува првата лицитацијата: Понуден недвижен имот конфискуван од Сашо Мијалков за половина милион евра
Агенцијата за управување со одземен имот објави оглас на кој се понудени првите конфискувани недвижнини од поранешниот шеф на тајната полиција Сашо Мијалков кои се во вредност од околу 520.000 евра. Јавното електронско наддавање е закажано за 25 август. Најповолниот понудувач треба да ја уплати целосната сума до 15 дена од заклучувањето на лицитацијата.
Понудени на продажба се два стана на улица Горица во Охрид, од кои едниот од 65 метри квадратни со проценета вредност од Бирото за судски вештачења на 5.775.234 милиони денари, а другиот во истата зграда од 114 метри квадратни проценет на 9.032.505 денари.
На продажба е и земјиште од 56.818 метри квадратни кај Морани во Општина Студеничани крај Скопје со почетна вредност од 17.045.421 денари, а се нуди и мал плац кај местото Џибарица на Кожуф од 321,81 метри квадратни проценето на само 29.686 денари.
„Право на учество на јавното наддавање по електронски пат имаат сите физички и правни лица, освен осуденото лице од кого е конфискувана недвижноста, вработените лица во Агенцијата за управување со одземен имот, како и друго лице кое службено учествувало во постапката за продажба“, гласи еден од условите во огласот објавен од страна на Агенцијата за управување со одземен имот.
Процесот на проценка на запленетиот недвижен имот траеше половина година, по што Агенцијата за управување со одземен имот објави дека станува збор за вкупна вредност од 15 милиони евра, иако првично Обвинителството сметаше дека вреди околу 30 милиони евра.
Од Агенцијата за управување со одземен имот рекоа дека одземеното од Мијалков изнесува 15 милиони евра во недвижен имот, 350 илјади евра во акции и околу 6,1 милиони евра готовина. Претходно во јули на аукција на берза беа ставени запленетите акции на Мијалков од неколку акционерски друштва со вкупна почетна вредност од 268 илјади евра. Беше соопштено дека се понудени по принципот „се или ништо“, но засега нема информации за исходот од продажбата.
Засега нема информации кога ќе се продаваат поатрактивните недвижнини одземени со спогодба од поранешниот директор на УБК, како што се апартманите на Водно.
А.К.
