Започна хоророт на северот на Газа: Нападнат конвој палестински цивили, меѓу убиените има и деца
На северот на Газа имаше напад врз конвој палестински цивили, откако Израел им порача на жителите да ја напуштат областа, а според првите извештаи од петокот вечерта меѓу убиените има и деца.
Би-Би-Си потврди дека нападот се случил на улицата Салах ал-Дин, една од двете рути за евакуација од северот на Газа кон југ.
Патот беше блокиран цел ден, бидејќи северните жители на Газа го послушаа предупредувањето на Израел да ја напуштат областа.
Британскиот јавен сервис вели дека на снимката се гледаат најмалку 12 тела. Главно се работи за жени и деца, меѓу кои има и деца од две до пет години.
Палестинското Министерство за здравство соопшти дека околу 70 луѓе биле убиени на самото место и го обвини Израел за нападот.
Израелските одбранбени сили (ИДФ) велат дека го истражуваат нападот, но тврдат дека „непријателот се обидува да ги спречи цивилите да го напуштат северот“.
Би-би-си додава дека нападот се случил на една од двете рути за евакуација. Израел им порача на жителите на северниот дел на Појасот Газа, каде живеат повеќе од милион Палестинци, да се евакуираат на југ, пред најавената израелска копнена офанзива.
Денеска Израел соопшти дека им дал на преостанатите цивили уште неколку часа да се евакуираат.
Повикот за евакуација се однесува на градот Газа и на двата главни бегалски кампови, Џабалија и Камп на плажа.
Организациите за човекови права рекоа дека ваквото големо движење на луѓе неизбежно мора да предизвика хаос и дека тоа е крајно опасно, додека Обединетите нации велат дека е невозможно да се евакуираат 1,1 милион Палестинци кои живеат на северот на Појасот Газа во 24. часови..
