Давкова: Доста ни се „пост-фестум“ извинувања, на Македонија ѝ треба деблокада сега!
На отворањето на Меѓународната конференција на Паневропската унија во Скопје, претседателката порача дека ЕУ е нецелосна и ранлива без Западен Балкан, додека австрискиот амбасадор предупреди на штетноста од ирационалните билатерални блокади.
Македонските граѓани се уморни од сожалувања и извинувања на поранешни европски функционери за неправдите од минатото – на државата ѝ се потребни итни решенија за деблокада. Ова е клучната порака на претседателката Гордана Сиљановска-Давкова, која вечерва во својот кабинет беше домаќин на високи претставници на Паневропските унии на Македонија и Австрија, фондацијата „Ото фон Хабсбург“ и Институтот на регионите на Европа од Салцбург.
Користејќи ја симболиката на мозаиците на Глигор Чемерски кои го красат претседателскиот кабинет, Сиљановска-Давкова нагласи дека Западен Балкан е „парчето што недостасува“ за Европа да биде комплетна.
„Наместо господинот Годо, кој никако да дојде, нам ни е потребен нов ‘господин Европа’ или ‘госпоѓа Европа’ – нов Паневропеец кој ќе ја заокружи визијата започната пред повеќе од еден век“, истакна претседателката.
Австрискиот амбасадор Мартин Памер беше дециден дека процесот на интегрирање на Југоисточна Европа трае предолго со многу грешки и неуспеси. Тој упати критика до одредени земји-членки кои користат политички условувања за билатерални прашања.
Претседателот на Паневропската унија на Македонија, Андреј Лепавцов, оцени дека оваа година ќе биде една од најдинамичните за евроинтеграциите. Според него, фокусот мора да биде на три столба:
Конференцијата во Скопје ја потврди посветеноста на европските пријатели на Македонија, но и јасно ја исцрта фрустрацијата од статус-кво состојбата која го држи регионот во неизвесност предолго време.
