Заложници на дива рампа: Хаос на „Варшавска“ – Улица блокирана со обичен допис, Брза помош и Пожарна не можат да припарат до зградите

Жителите на „Варшавска 19А“ во скопската населба Тафталиџе се ставени во опасна стапица. Диво поставена рампа, одобрена не со решение, туку со обичен допис од неовластено лице од Општина Карпош, целосно го блокира пристапот до нивните домови. Додека институциите си ја префрлаат топката, граѓаните стравуваат: „Што ако избие пожар или некому му се слоши?“

Скандалот добива на тежина со фактот што рампата не е поставена на приватен имот, туку на Катастарска парцела 3005/1 (Имотен лист 4918), која е сопственост на Република Северна Македонија и која според Деталниот урбанистички план (ДУП) е УЛИЦА.

Според документите, сопствениците на станови од соседната зграда („Варшавска 19“) побарале поставување на рампа. Наместо законска процедура, добиле „зелено светло“ преку обичен спис во форма на одговор, потпишан од Шеф на кабинет во Општина Карпош – лице кое нема законски овластувања да издава одобренија за поставување урбана опрема.

Овој „документ“, кој не е ниту Решение, ниту Дозвола, послужил како алиби за узурпација на јавна површина – улица.

Жителите на блокираната зграда (19А) веќе десет дена водат битка со институциите, но наидуваат на ѕид од молк:

Иако законскиот рок за постапување по пријава за вонреден надзор е веднаш (најдоцна до 10 дена), институциите молчат.

Врвот на апсурдот се случил на 10.12.2025 година. Инспектор од Град Скопје излегол на терен и констатирал дека рампата е поставена незаконски.

Меѓутоа, решение за отстранување нема. Според станарите, раководител на одделението во Град Скопје (посочен како Љубе), телефонски ги известил дека „нема да донесат решение за отстранување“. Образложението? Ова бил „генерален проблем на ниво на град“ кој ќе се решавал системски со зонско паркирање. На прашањето како до тогаш ќе пристапат возила на Брза помош, Противпожарна бригада или ЦУК во итна ситуација, одговор немало.

Соочени со директна загрозеност на безбедноста и имотот, станарите на „Варшавска 19А“ велат дека немаат друг избор. Тие најавуваат масовен протест и блокада на улицата доколку надлежните итно не ја отстранат незаконската пречка што го дели нивниот дом од остатокот на светот.