ЗАДОЛЖИТЕЛНО ТЕСТИРАЊЕ ЗА КОВИД АКО ПОСТОЈАТ СИМПТОМИ: Носење маски во сите здравствени установи, Србија враќа дел од мерките

Поради брзото зголемување на бројот на заразени со корона вирусот во Србија во
последните три недели, работната група на Министерството за здравство за
справување со состојбите од пандемијата, денеска се состана и даде препораки за постапување на ниво на примарна
здравствена заштита, болниците,
институциите, како и во однос на носењето маски во здравствените установи и
вакцинацијата.

Така, на ниво на примарна здравствена заштита, задолжително
е тестирање за КОВИД на сите вработени во здравствените установи, доколку имаат
симптоми на акутна респираторна инфекција и нивна задолжителна контрола и
тестирање откако ќе помине инфекцијата, како и тестирање на контакти со
ковид-позитивни лица во здравствени установи.

Беше истакната и важноста од тестирање на пациенти со знаци
и симптоми на акутна респираторна инфекција, пред се, а особено оние со ризик
фактори за развој на тешка клиничка слика. Работната
група зазеде став дека е неопходно да се носат заштитни маски во сите
здравствени установи.

Како што беше најавено по средбата, на ниво на болнички
установи неопходно е тестирање за прием на хематолошки и онколошки одделенија,
геријатрија и одделенија каде се лекуваат пациенти со примарна и тешка
имунодефициенција. Исто така, потребно е да се тестираат сите пациенти кои
имаат симптоми и знаци на акутна респираторна инфекција, во моментот на прием
на болничко лекување.

И покрај зголемувањето на бројот на заболени во последните
три недели, Работната група смета дека засега не е потребно дополнително
проширување на болничките капацитети.

Одлуката за забрана на посети во болница се носи поединечно

Во соопштението се наведува и дека Комисиите за спречување
на болнички инфекции се задолжени да ја следат епидемиолошката состојба во
здравствените установи и да донесат одлука за евентуална забрана за посета на
болници.

Од петокот се забранети посетите на Институтот за онкологија
каде се заразени околу 40 пациенти и десетина вработени.

Препораки за продолжување на вакцинацијата

Во соопштението на Батут по состанокот на работната група за
ковид, се наведува и дека вакцинацијата против ковид 19 се спроведува согласно
препораките на Стручната комисија за имунизација, а согласно
Стручно-методолошките упатства на Институт за јавно здравје на Србија.

Беше нагласена важноста на вакцинацијата против Ковид 19 и
вакцинацијата против сезонски грип (која може да се администрира истовремено
или во било кој временски интервал), со оглед на претстојната сезона на
респираторни инфекции.

ФОТО: YouTube Print Screen