ПРОШИРУВАЊЕТО НА ЕУ Е ИНВЕСТИЦИЈА ВО СОПСТВЕНАТА БЕЗБЕДНОСТ Муцунски со порака од Скопје до Брисел
Проширувањето на Европската Унија со земјите од Западен Балкан не е само инвестиција во стабилноста на регионот, туку и стратешка инвестиција во безбедноста, силата и иднината на Европа, порача министерот за надворешни работи Тимчо Муцунски.
Муцунски ова го истакна на отворањето на конференцијата „Европски дијалози, европско наследство и иднина“, која од 29 септември до 2 октомври се одржува во Скопје. Настанот е организиран од Францускиот институт во Париз, Францускиот институт во Скопје и Амбасадата на Франција.
Според Муцунски, членството во ЕУ останува стратешка определба на Македонија, но пристапниот процес треба пред сè да придонесе за подобрување на институциите и создавање нови можности за граѓаните.
– Пристапниот процес треба да го трансформира нашето општество, да ги зајакне нашите институции и да создаде повеќе можности за нашите граѓани. Тој не треба да го трансформира нашиот национален идентитет – порача Муцунски.
Тој нагласи дека европската перспектива треба да остане кредибилна, предвидлива и заснована на заслуги, при што напредокот на земјите кандидати треба да зависи од спроведувањето на реформите и исполнувањето на европските критериуми.
Францускиот амбасадор во Македонија, Кристоф Ле Риголер, посочи дека „Европските дијалози“ се организираат од 2023 година во различни европски градови со цел да се поттикне дебата за иднината на Европа и европскиот проект.
Говорејќи за темата на годинашното издание – „Наследство и европска иднина“, Ле Риголер истакна дека историјата и иднината се неразделно поврзани.
Тој посочи дека конференцијата во Скопје е завршен настан од програмата „Споделени хоризонти“, иницирана во 2024 година со цел поттикнување дијалог за историските сеќавања и создавање заеднички европски перспективи на Западен Балкан. Официјалната програма потврдува дека настанот е завршна активност на програмата „Shared Horizons“ и дека во фокус се заедничките наследства, траектории и европските хоризонти на Балканот и Европа.
Според Ле Риголер, Европа не се гради само преку институции и политики, туку и преку споделени искуства, идеи и солидарност.
Тој нагласи дека различните историски наративи треба да бидат основа за дијалог, а не за поделби.
– Европа не почива на бришењето на различностите, туку на капацитетот да живееме заедно и да градиме заедничка рамка во која различноста ќе може да го даде својот целосен придонес – истакна Ле Риголер.
На конференцијата учествуваат истражувачи, новинари, активисти, уметници, студенти, дипломати и институционални претставници од Франција, Македонија и други европски земји, а посебен фокус е ставен на младите од Западен Балкан.
Во наредните денови учесниците ќе разговараат за заедничкото европско наследство, граѓанските движења, различните историски наративи, европските вредности и визиите за иднината на Европската Унија.
Конференцијата беше отворена во Музејот на современата уметност во Скопје со изложбата „Солидарноста како иднина“. Поставката потсетува на меѓународната културна солидарност со Скопје по земјотресот во 1963 година, кога уметници од Франција и други европски земји донирале дела за градот. Меѓу авторите чии дела се претставени се Пјер Сулаж, Виктор Вазарели и Никола Мартиноски.
Програмата продолжува до 2 октомври со дебати, предавања, работилници и јавни дискусии посветени на историјата, заедничките европски вредности, различностите и иднината на европскиот проект.
.
Извор: plusinfo.mk
