ЗАБРАНА ЗА РАБОТА ЗА 30 КОМПАНИИ КОИ НЕ ГИ ПОЧИТУВАЛЕ ОДРЕДБИТЕ – Инспекторите на терен
Триесет компании добија решение за забрана за работа откако биле извршени надзори во 164 фирми во кои изложеноста на топлина е најголема. Ова го посочи министерката за труд и социјална политика Јована Тренчевска, при посета на детската градинка „Кочо Рацин“.
Одговорајќи на новинарско прашање Тренчевска посочи дека поради новите владини мерки и препораки за заштита на граѓаните од високите температури во изминантите неколку дена Државниот инспекторат за труд бил постојано на терен, при што од вкупниот број на надзори, кај 30 работодавачи биле изречени забрани за вршење на работа.
Поради топлотниот бран што ја зафати земјава, Владата донесе одлука бремените жени и лицата над 60 години да бидат ослободени од работа, во установите за згрижување на децата да не се практикува физичка активност и да не се изнесуваат децата на отворено во периодот од 11 до 17 часот, а единиците на локалната самоуправа, Црвениот крст и Центрите за социјални работи, во регионите зафатени со топлотниот бран да пружаат помош на осамени, стари, изнемоштени лица и бездомници.
– Државните органи и јавните претпријатија и установи да ги почитуваат препораките. Сите правни субјекти кои вршат активности на отворено, да ги запрат активностите во периодот од 11:00 до 17:00 часот, а ова особено се однесува на работата на градежните работници – стои во соопштението од Владата.
