За три нови возила ќе платиме 122.000 евра на „Порше лизинг“ – се поднови Агенцијата за супервизија на осигурување
Агенцијата за супервизија на осигурување склучи договор со компанијата „Порше лизинг ДООЕЛ Скопје“ за набавка на три нови патнички возила преку оперативен лизинг во времетраење од три години. Вкупната вредност на договорот, со вклучен ДДВ, изнесува 7.494.445,50 денари, или околу 122.000 евра.
Договорот, кој бил склучен на 20 август 2025 година, предвидува „Порше лизинг“ во рок од 120 дена да ѝ испорача на Агенцијата три целосно нови возила.
Според условите, станува збор за пакет „сè вклучено“, каде што давателот на лизингот е должен да ги покрие сите трошоци во наредните три години. Ова вклучува регистрација, целосно каско осигурување, осигурување од авто-одговорност, зелен картон, како и сите редовни и вонредни сервиси и одржување на возилата. Агенцијата, како корисник, е должна да ги плаќа само месечните рати.
Договорот, потпишан од претседателката на Советот на експерти на АСО, Ели Дракуловска, и овластеното лице на „Порше лизинг“, Филип Стефаноски, содржи и строги пенали за доцнење.
Доколку „Порше лизинг“ доцни со испораката на возилата, ќе плаќа казна од 0,5% од вкупната вредност на договорот за секој ден доцнење. Доколку доцнењето надмине 120 дена, Агенцијата има право да го раскине договорот и да наплати отштета од банкарската гаранција.
