ЗА СУМА ОД 1,55 МИЛИОНИ ЕВРА КУПЕНИ БЕЗМАЛКУ ЕДЕН ОТСТО ОД АКЦИИТЕ НА „МАКПЕТРОЛ“ – кому му беа навистина потребни пари
Берзата извести дека денеска поминала блок трансакција со акциите на „Макпетрол“, во која некој купувач за акции кои сочинуваат околу еден процент од капиталот на најголемиот нафтен дистрибутер во земјава платил сума од 1,55 милиони евра.
Всушност, се продала количина од 1.094 акции на „Макпетрол“, по цена од 87.232 денари за акција, што значи дека за оваа акционерска количина е платена вкупна сума од 1,55 милиони евра.
А, тоа одговара на 0,97 проценти од основната главнина на акционерското друштво, односно од вкупниот акционерски капитал.
Сумата по која се продадоа овие акции е многу пониска од онаа по која акциите се продаваат на редовниот пазар, односно на класичното тргување на берзата.
Па така, една акција на „Макпетрол“ вчера на редовниот берзански пазар достигна просечна цена од 106.000 денари за акција, додека, пак, денеска, се досега немаше тргување со акции на Макпетрол.
Најниската цена која ја имале акциите на Макпетрол во последниов период на редовното берзанско тргување е нешто над 99 илјади денари за акција.
Во последниов период на редовниот пазар се тргуваат прилично мали количини на акции, што упатува на тоа дека на денешниов блок продал некој кој имал посолиден пакет од 0,97 отсто, но веројатно и му биле потребни средства, па затоа решил да ги продаде своите акции топтан, но по цена прилично пониска од редовната берзанска.
Н.Н.Ф.
