За што ќе одговара сопругот на починатата Ивана?
Трагедијата што вчера го потресе Скопје отвори сериозни прашања за институционалното постапување во случаи на семејно насилство. Министерот за внатрешни работи Панче Тошковски денеска изнесе нови детали за настанот во кој Ивана и нејзиното шестгодишно дете го загубија животот скокајќи од тераса на зграда во Карпош.
Според министерот, истиот ден околу 12 часот се случил физички напад, за кој, како што рече, постои видеозапис на кој се гледа како сопругот ја удира жртвата. Подоцна, по интервенцијата на полицијата, жената потпишала изјава во која навела дека немало физички контакт, туку недоразбирање, дека не бара понатамошна постапка и дека брачните односи ќе ги решава преку развод.
Тошковски посочи дека ќе се утврдува дали таквата изјава била дадена под страв, притисок или закани. Тој информираше дека сопругот, Стојанче Јовановски, по трагедијата е осомничен за наведување на самоубиство, нанесување тешки телесни повреди и загрозување на сигурноста.
На новинарско прашање дали полицијата постапила соодветно, министерот рече дека не тврди оти сè било спроведено „100 проценти перфектно“ и дека ќе се анализираат сите аспекти на случајот. Тој повеќепати нагласи дека со новите законски измени полицијата има пошироки овластувања да постапува по службена должност, особено кога се констатираат видливи телесни повреди.
„Во такви случаи, жртвата нема да може да го повлече предметот, а Министерството ќе мора да продолжи со постапката“, рече Тошковски, додавајќи дека и потенцијалните сторители и жртвите ќе бидат повикувани на информативни разговори согласно Законот за полиција.
Тој предупреди дека кога жртвата се повлекува од пријавата, институциите се соочуваат со сериозни предизвици во докажувањето на делото, поради што е потребна координирана вклученост на центрите за социјална работа и другите надлежни институции, како и поголема јавна свест за пријавување на семејното насилство.
По полициската интервенција и потпишувањето на изјавата, жената се упатила кон станот на улицата „Теодосиј Гологанов“ во Карпош. Подоцна се случила трагедијата. Во моментот на настанот, сопругот не бил во станот.
Министерот наведе дека во изминатите две години против Јовановски имало десет кривични пријави поврзани со имотни деликти, насилен криминал и недозволена трговија со дрога, како и дека му биле изречени мерки на претпазливост. Во 2025 и 2026 година биле евидентирани повеќе пријави за нарушени односи меѓу сопружниците, но оштетената се повлекувала од пријавите.
Во меѓувреме, Министерство за социјална политика, демографија и млади соопшти дека е извршен вонреден инспекциски надзор во Центарот за социјални работи Скопје за утврдување на фактичката состојба и начинот на постапување.
Според првичните информации, починатата и нејзиниот сопруг за првпат биле евидентирани во Центарот на 7 октомври 2025 година по барање на Основниот граѓански суд во постапка за развод. Допис од Министерството за внатрешни работи во врска со пријавено насилство бил примен на 2 февруари 2026 година и се однесувал на настан од 19 декември 2025 година.
Инспекцискиот надзор е во тек, а по неговото завршување надлежните најавуваат транспарентно информирање на јавноста за наодите и евентуалните понатамошни мерки.
