Тошковски: МВР има обезбедена снимка доказ за насилство во Карпош!
Министерот за внатрешни работи, Панче Тошковски, денеска на прес-конференција информираше дека во рамки на истрагата за трагедијата во скопската населба Карпош е обезбеден видео запис на кој, како што рече, јасно се гледа како сопругот ја удира жртвата.
„До МВР е обезбеден видео запис каде јасно се гледа како сопругот ја удира жртвата. Не можам да кажам точното време, но сигурно е истиот ден“, изјави Тошковски.
Според него, жртвата претходно повикала полиција, а полициска патрола пристигнала за помалку од десет минути. Во изјавата што ја дала пред службениците навела дека нема што да пријави и дека не се случил физички напад. Министерот посочи дека дополнително ќе се утврдува дали таа изјава била дадена под присила. Во моментот на прибирање на изјавите, сторителот не бил присутен.
Тошковски информираше дека вчера околу 14:00 часот бил пријавен пад од зграда. Претходно, полицијата разговарала со жената, која не побарала понатамошна интервенција. Потоа таа се упатила кон станот на улицата „Теодосиј Гологанов“ во Карпош, каде што подоцна се случила трагедијата. Во моментот на настанот, според информациите од истрагата, таа и ќерката биле сами во станот и вратата била заклучена одвнатре.
Сопругот е приведен и против него се води постапка под сомнение за наведување на самоубиство, нанесување тешки телесни повреди и загрозување на сигурноста.
Министерот потсети дека во изминатите години против осомничениот биле поднесени 10 кривични пријави за дела поврзани со насилен криминал, имотни деликти и трговија со дрога.
Тој нагласи и дека значителен број предмети поврзани со семејно насилство се затвораат поради повлекување на пријавите од страна на жртвите, што, како што оцени, претставува сериозен предизвик за институциите во процесирањето на ваквите случаи.
