Заѕиданите 350.000 евра не биле на судијата – родителите признале дека се нивни!
Адвокатот Звонко Давидовиќ, бранител на апелациониот судија Ѓоко Ристов кој се наоѓа во куќен притвор, оценува дека истрагата за противправно стекнување и прикривање имот е правно неоснована и неприменлива за судија.
Во изјава за ТВ24, Давидовиќ посочи дека кривичното дело на кое се повикува Обвинителството се однесува исклучиво на одговорни и службени лица во јавни установи, јавни претпријатија или органи кои управуваат со државен имот, а судството, според него, не спаѓа во таа категорија.
Тој нагласи дека ваквата правна квалификација не може да се примени ниту на судии, ниту на обвинители, што, како што вели, отвора сериозни дилеми околу законитоста на постапката.
Како клучен доказ во предметот, Обвинителството ги наведува 350 илјади евра пронајдени при претрес во домот на родителите на Ристов. Сепак, Давидовиќ тврди дека според записникот од претресот, парите биле пријавени како лични средства на родителите, што, како што истакна, го потврдува и самата обвинителка.
„350 илјади евра беа најдени кај неговите родители, кои на записникот изјавиле дека се нивни лични средства“, изјави Давидовиќ.
