за 9 месеци лани имало 1166 случаи на семејно насилство во Македонија – најчесто тоа биле жени!
Министерката за труд и социјална политика, Јованка Тренчевска денеска на прес конференција посочи дека од јануари до септември минатата година пријавени се 1166 случаи на семејно насилство.
Според неа, 708 се поврзани со психолошкото насилство.
„Од јануари до септември 2023 година имавме вкупно 1166 случаи на семејно насилство. Сега ги прибираме за цела година, од септември до декември. Наскоро ќе ги објавиме податоците за цела 2023 година. Да, најголем дел, 708 случаи, се пријави на психолошко насилство за разлика од претходно, каде што најчест вид на насилство беше физичкото насилство. Во делот на психолошкото насилство имаме постојано пребацување или префрлување на партнерката, на деца или на родители, и се тоа остава длабока трага на психата на една личност и многу е тешко за препознавање. Жртви на насилство се деца и повозрасни граѓани, но најголем процент и понатаму се токму жените“, изјави Тренчевска.
Таа посочи дека психолошкото насилство многу тешко се докажува бидејќи нема видливи траги, освен опаѓање на менталното и на психичкото здравје на граѓаните.
Како што информираше, најголем број од жртвите на психолошко насилство се жените.