Возачите во Истанбул минатата година поминале 105 часа заглавени во сообраќајни метежи, покажува студијата
Возачите во Истанбул поминале над 100 часа заглавени во сообраќајни метежи во 2024 година, според студија спроведена со употреба на вештачка интелигенција, објавена од „Дејли Сабах“.
Според студијата, минатата година во метрополата имало вкупно 97.000 сообраќајни несреќи, што довело до застој во сообраќајот, како резултат на што возачите изгубиле 105 часа од животот во сообраќајни метежи.
Истанбул минатата година беше рангиран на прво место во светот по часови изгубени поради сообраќајни метежи, а по него следуваат Њујорк, Чикаго, Лондон и Мексико, на ранг-листата на INRIX – меѓународна фирма за софтвер и податоци со седиште во САД, потсетува „Дејли Сабах“. Рангирањето се базира на анализа на податоци и трендови за транспорт од 946 урбани области низ целиот свет.
Според нова студија за сообраќајните метежи предизвикани од сообраќајни несреќи, затворањето на една лента поради несреќа го зголемува времето на чекање за најмалку 10 минути во Истанбул. Малите несреќи во кои учествуваат мотоцикли предизвикуваат сообраќаен метеж од 20 до 30 минути, додека судирите во кои учествуваат две возила или мали камиони можат да го забават сообраќајот до час и половина.
Студијата ја подготви д-р Хусеин Коркмаз од Факултетот за транспорт и логистика на Универзитетот во Истанбул. Според експертот, изградбата на пошироки патишта во Истанбул обезбедува само краткорочно олеснување, а сообраќајните услови нема да се подобрат без контрола на приливот на население во Истанбул и порамномерна распределба на можностите за работа низ целата земја.
