„Во вторник 99%“: Стоилковиќ најави разрешување на директорот на Инспекторатот за употреба на јазиците
Министерот за Односи меѓу заедниците, Иван Стоилковиќ, синоќа во емисијата „На кавга со Иван“ најави дека на наредната владина седница ќе биде покрената иницијатива за разрешување на директорот на Инспекторатот за употреба на јазиците, Арсим Идризи.
„Во вторник, на идната седница сигурно ќе биде разрешен, па 99%“, изјави Стоилковиќ. На прашањето од водителот дали ќе поднесе оставка доколку тоа не се случи, министерот одговори:
„Зошто јас да поднесам оставка? Јас имам концесија да поднесам иницијатива до Владата за веднаш да биде сменет. Ќе пуштам и информации за разрешувањето – не само за ова, туку и за нешто друго.“
Министерот откри дека бил мета на јавни напади поради ситуацијата со веб-страницата на Министерството која, според него, била достапна само на албански јазик.
„Не е во ред. Јас истрпев салва напади врз мене, а не знаев што се случува. Сајтот бил само на албански, па нели треба еден-два дена да се сруши за да се смени? Јас одговарам за своите постапки, но за нешта што се надвор од моја надлежност – ќе покренувам иницијативи“, рече Стоилковиќ.
Оваа најава доаѓа по инцидентот кога директорот на Инспекторатот одби да се обрати на македонски јазик пред новинарите, упатувајќи ги наместо тоа да чекаат писмено соопштение.
