Во Украина убиен војводата на Четничкиот покрет Братислав Живковиќ
Братислав Живковиќ, контроверзниот командант на четничкото движење од Србија, е убиен во Украина за време на контраофанзивните борби во областа Курск. Според првичните неофицијални информации, Живковиќ бил убиен ноќта на 2 јануари, додека учествувал во судирите во областа Курск.
Веста за неговата смрт се појави на групите на руски Телеграм, каде што неговите другари ја изразија својата тага поради загубата. Во еден од постовите стои:
„Во текот на ноќта на 2 јануари, во тешките борби за ослободување на регионот Курск, како херој загина нашиот пријател и брат, командант на јуришниот вод Братислав Живковиќ.
Живковиќ со години беше познат по своите активности во странски конфликти, особено во Украина, каде што се бореше на страната на проруските сепаратисти. Неговото учество во овие конфликти започна во 2014 година, кога тој, како водач на група српски доброволци, отиде на Крим, за време на руската анексија на тој украински полуостров.
Тој самиот тврдеше дека учествувал во битките за Луганск и Доњецк, двата клучни града во источна Украина, кои станаа точки на конфликт меѓу украинските сили и проруските сепаратисти.
Живковиќ беше во центарот на бројни контроверзи и во Србија. Во 2018 година беше уапсен под сомнение дека организирал учество на српски државјани во странски воени конфликти, нудејќи им месечен надоместок.
Поради неговите активности, Живковиќ беше означен како закана за националната безбедност на Романија во 2017 година. Нему му беше забранет влез во земјата 15 години откако беше фатен како фотографира воени радари на брегот на Црното Море и се обидува да ги пренесе нивните ГПС координати. Забраната подоцна беше проширена и на другите земји на НАТО.
Потоа, Живковиќ се преселил во Бугарија, а потоа во Русија, каде што ја продолжил соработката со проруските воени и политички структури.
Јавното обвинителство на Украина го истражуваше Живковиќ заедно со уште пет српски државјани за напади врз украинските сили во регионите Доњецк и Луганск.
Во 2023 година, Живковиќ беше присутен во публиката за време на говорот на рускиот претседател Владимир Путин, кој беше снимен од камерите на руските државни агенции.
