Во Северна Митровица експлодирала рачна граната – Косово тврди дека Вучиќ го нарачал нападот

Koсовските власти велат дека нападот со рачна граната синоќа во северно Косово го наложил српскиот претседател Александар Вучиќ. Во населбата „Бошњачко маало“ во Северна Митровица, синоќа, нешто пред полноќ, експлодирала рачна граната, која предизвикала само материјална штета.

Министерот за внатрешни работи Џелал Свечља, изјави дека фрлањето на воената рачна граната синоќа на северот на земјата било извршено по наредба на претседателот на Србија, Александар Вучиќ, јави дописникот на МИА од Приштина.

Свечља на својата страница на Фејсбук напиша дека криминалниот чин е извршен во знак на револт поради апсењето на тројца Срби обвинети за воени злосторства.

„Инспирацијата, поддршката и нарачката за овој криминален чин дојде од поранешниот министер за пропаганда во времето на (Слободан) Милошевиќ, Александар Вучиќ. Србија изврши геноцид во Косово. Србија на чело со Вучиќ не само што не го прифаќа овој факт, туку ги велича воените злосторници. Доказ за нејзиниот непроменет став е самото планирање на чинот на фрлање на гранатата“, вели Свечља.

Тој порача дека злосторствата извршени за време на војната во Косово ќе ги гонат до крај.

Неодамна во Звечан и Митровица, косовската полиција уапси тројца Срби за наводни воени злосторства.