Во болницата во Гостивар примени 10 доктори и 10 медицински сестри, сите Албанци – директорот вели партија одлучува кој ќе е вработен!
Директорот на Општата болница „Ферид Мурад“ во Гостивар Илбер Адеми, во видео кое стигнало до редакцијата „ПорталиИкс“, вели дека партијата одлучува кој ќе биде вработен, откако месецов таму беа примени 10 доктори и 10 медицински сестри, сите од албанска националност.
Во видеото, кое веројатно е снимено тајно, се слуша гласот на Адеми како на кандидат за вработување му вели дека на огласот имало еден куп кандидати, но дека на крај не одлучува тој, туку партијата.
„Еден куп кандидати, пекол е. Знам дека товарот ќе падне врз мене, но на крај јас не одлучувам. Одлучува некој друг. Од страна на партијата добиваме зелено светло за да се влезе во финалната листа“, се слуша на снимката.
Адеми во разговор со новинарот на „ПорталиИкс“ Фуркан Салиу, потврди дека тоа е неговиот глас и дека е член на ДУИ, но и тврди дека не може да го командува никој.
Во меѓувреме, за огласот реагираа општинските организации на СДСМ и ВМРО-ДПМНЕ, и двете партии побараа огласот да биде поништен. Одлуката за вработување на 10 доктори и 10 медицински сестри во Гостиварската болница е од 9 февруари.
Од СДСМ и ВМРО-ДПМНЕ велат дека е грубо прекршено начелото на за соодветна и правична застапеност на граѓаните.
