Во болница двајцата државјани на Косово откако беа повредени при падот на авионот во Мавровското Езеро
Двајца државјани на Косово се повредени откако мал спортски авион попладнево паднал во водите на Мавровското Езеро, во близина на браната „Белички канал“. Информацијата ја потврдија од СВР Тетово, кои го потврдија инцидентот и деталите за настанот.
Според портпаролот на СВР Тетово, Фатмир Реџепи, случајот бил пријавен денеска во 12:35 часот во ОВР Гостивар. Пријавено било дека мало воздушно летало завршило во езерото под засега нерaзјаснети околности.
„Според досега пријавеното, од авионот успеале да излезат на копно двајца косовски државјани, Џ.П. (41) и Д.М. (64), кој во моментот го управувал леталото. Двајцата се здобиле со телесни повреди и се пренесени во Медицинскиот центар во Гостивар за укажување лекарска помош“, изјави Реџепи.
На местото на настанот веднаш интервенирале полициските службеници од Полициското одделение Маврово. При првичниот разговор со нив, пилотот Д.М. изјавил дека авионoт слетал во езерото поради дефект на моторот, по што тој и сопатникот успеале да се извлечат од леталото.
Полицијата презема мерки за целосно расчистување на случајот и утврдување на причините за падот на авионот.
