Отворена истрага за падот на спортскиот авион во Мавровско Езеро
Комитетот за истрага на воздухопловни несреќи и сериозни инциденти (КИНСИВ) започна постапка за утврдување на причините за денешниот пад на мал спортски авион во водите на Мавровското Езеро.
Претседателот на комитетот, Марјан Прпоски, за МИА потврди дека членовите на екипажот не се во животна опасност.
Според првичните информации, КИНСИВ околу 12:30 часот добил пријава дека спортски воздухоплов од типот „Пајпер 28“ принудно слетал во езерото поради засега непознати причини.
„Тимот на КИНСИВ веднаш излезе на терен и ја започна истрагата. Воздухопловот е во приватна сопственост, со американски регистарски ознаки, а посадата не е во животна опасност“, изјави Прпоски, додавајќи дека во наредните денови се очекуваат дополнителни информации од истрагата.
Комитетот ќе ги истражи техничките, оперативните и околностите поврзани со летот со цел да се утврди точната причина за инцидентот.
