ВМРО-ДПМНЕ: Обвинувањата на СДС се гнасни лаги, Обвинителството да престане да ги штити и да ги истражи
Владејачката ВМРО-ДПМНЕ со остра реакција ги отфрли како „гнасни и истовремено глупи лаги“ обвинувањата изнесени од потпретседателот на СДСМ, Методија Илиевски, во врска со случајот АНБ. Од партијата го пренасочија притисокот кон Јавното обвинителство, кое го повикаа веднаш да одговори на сите прашања и да престане да дозволува создавање шпекулации кои, според нив, СДСМ ги користи за водење „прљава и лажна кампања“ против Христијан Мицкоски.
Од ВМРО-ДПМНЕ велат дека обвинувањата на СДСМ се истите тези кои ги повторувале со години без никаков епилог и го поставија клучното прашање: „Зошто не е уапсен? 7 години на власт, следење, подметнувања, обиди за рушење во партијата, и пак ништо“, се вели во соопштението.
Партијата го обвини Обвинителството дека со своето молчење докажува оти „игра по нотите на СДС“ и дека е главна пречка за борбата против корупцијата во државата.
„Ги прашуваме како е можно после 1 година без СДС и ДУИ во власта, после сите докази што им се доставени и после сите афери… обвинителството молчи, и ги штити криминалците“, реагираат од ВМРО-ДПМНЕ.
Тие го повикаа Обвинителството да започне истрага токму за случаите кои СДСМ ги наметнува, вклучително и за следењето, но и да ја истражи целата работа на институциите под раководство на претходната власт на СДСМ и ДУИ.
„Со молчење и со шурување со СДС и ДУИ, обвинителството станува дел од оската на корупција и политикантство и како и ДУИ и СДС, срам за државата“, заклучуваат од Центарот за комуникации на ВМРО-ДПМНЕ.
