ВМРО-ДПМНЕ ГО ПОВИКА ОБВИНИТЕЛСТВОТО ДА ЈА ИСТРАЖИ ВРСКАТА НА ЗАЕВ И ФИЛИПЧЕ СО МАРИХУАНАТА Дуото да одговори и за поврзаноста со газдата на фирмата
По сѐ што Филипче и СДС, се обидуваат да ѝ сервираат на јавноста околу темата за канабис, редно е да дадат и објаснување за фотографијата со Тони Котев, сопственикот на фирмата „ЦБД Медплант“, поврзана со илегална марихуана, велат од ВМРО-ДПМНЕ.
Оттаму велат дека наместо да водат кампања која е само спин и манипулација, Филипче и СДСМ јавно да објаснат каде завршувала марихуаната што, според законите, не можела да се користи како легален медицински производ. Јавноста има право да знае дали станува збор за лични или партиски интереси и кој имал профит од овој нелегален бизнис.
Од ВМРО-ДПМНЕ го повикаа Јавното обвинителство итно и темелно да ја истражи целосната релација помеѓу Заев и Филипче, нивната можна вмешаност и одговорност во случајот со запленетата марихуана, како и сите околности што упатуваат на партиски и лични интереси во нарко-бизнисот.
„Филипче и Заев како најпознато криминално дуо кое некогаш постоело во земјава имаат оставено црн печат секаде, во секој сектор, во секоја институција, во секоја пора на општеството. Околу темата за канабисот, Филипче пред неколку дена на национална телевизија беше видливо нервозен и конфузен, а Заев пак никна на социјалните мрежи со статуси кои очигледно беа напишани во паника. Јавноста се сеќава кога во 2020 година, ова дуо сакаше да ја легализира марихуаната во земјава, па откако тоа не им успеа, се фрлија на масовно издавање лиценци за медицински канабис на лица кои беа блиски до СДС“, велат од ВМРО-ДПМНЕ.
За кратко време струмичкиот регион стана жариште на производство на марихуана, што според ВМРО-ДПМНЕ значи дека имало координирано ширење на индустријата под покровителство на Заев и Филипче.
„Клучниот момент е измената на Правилникот за одгледување канабис од 2023 година, каде во член 2 се додаде можноста канабисот да се одгледува и на отворено. Овој подзаконски акт за канабис е во директна колизија со законот, бидејќи дозволува производство на канабис цвет кој не ги исполнува ГМП стандардите. Ако не ги исполнува тие стандарди, финалниот производ не може легално да се користи како медицински“, нагласуваат од ВМРО-ДПМНЕ.
По заплената на 40 тони марихуана од компании со лиценци за медицинско производство, 70% од неа или околу 30 тони потекнува од „ЦБД Медплант“, или фирма основана во 2018 година од страна на блиски луѓе до Заев, поконкретно Христијан Котев, син на Тони Котев, кој е поранешен претседател на ОО на СДС во Ново Село, и човек близок до Заев, наведуваат од ВМРО-ДПМНЕ.
.
