Владата и официјално побара од Министерството за правда да предложи разрешување на Љупчо Коцевски
На денешната владина седница беше разгледано мислењето на Министерството за правда во врска со поведувањето постапка за разрешување на јавниот обвинител. По обемна дискусија, Владата донесе одлука да ја продолжи постапката, повикувајќи се на сериозни недостатоци во работењето на јавниот обвинител.
Во мислењето на Министерството за правда се нотирани повеќе проблеми, меѓу кои нарушениот углед на институцијата, сериозни правни пропусти, незаконски постапувања, корупција и неефикасност во работењето на Јавното обвинителство. Според Владата, ваквите состојби не се само нејзина перцепција, туку се потврдени од стручната јавност и релевантни извештаи со конкретни показатели.
„Овие дејствија предизвикаа сериозни последици врз функционирањето на Јавното обвинителство и претставуваат намерна и неоправдана професионална грешка“, се вели во соопштението на Владата.
Поради тоа, Министерството за правда е задолжено да изготви официјален предлог за разрешување на јавниот обвинител, кој Владата ќе го достави до Советот на јавните обвинители. Овој орган, согласно законските процедури, треба да даде свое мислење пред да биде донесена конечната одлука.
Владата истакна дека покрај правната одговорност, јавниот обвинител има и широка општествена одговорност, особено кон граѓаните, чии интереси треба да ги штити.
