„Визер“ ја затвора базата во Виена – последен лет за Охрид на 14 март 2026 година
Унгарската нискобуџетна авиокомпанија „Визер“ најави затворање на својата база во Виена, Австрија. Процесот на повлекување ќе се одвива постепено, од октомври 2025 до март 2026 година. Оваа одлука го става под неизвесност и идниот развој на линијата Охрид-Виена, за која моментално се достапни билети до последниот лет закажан на 14 март 2026 година.
Според специјализирани веб сајтови за цивилна авијација, одлуката е резултат на стратешка анализа на работењето во Австрија, каде „Визер“ се соочува со силна конкуренција и растечки трошоци.
Повлекувањето започнува на 26 октомври 2025 година, кога компанијата ќе ги повлече два авиони и ќе ги укине линиите до Билбао и лондонскиот аеродром Гетвик. Целосното затворање на базата е предвидено за 15 март 2026 година, со прекин на сите линии од Виена, вклучително и врската со Охридскиот аеродром „Свети Апостол Павле“.
„Визер“ ја отвори својата база во Виена во 2018 година, со намера да конкурира на „Аустриан Ерлајнс“ и „Рајанер“. Првиот лет Охрид-Виена беше реализиран на 17 ноември 2018 година. Летово „Визер“ сообраќаше до четири пати неделно за Охрид со авиони А321-нео од најновата генерација на „Ербас“. Во зимскиот ред на летање, заклучно со 14 март 2026 година, се предвидени два лета неделно од Виена за Охрид.
Компанијата се соочува со финансиски притисок и пад на вредноста на акциите поради зголемените трошоци, како и проблеми со долготрајните сервиси на моторите „Прат и Витни“, што доведе до приземјување на голем број авиони низ Европа.
Во меѓувреме, „Визер“ најави враќање на две линии од аеродромот во Скопје со државни субвенции. Од декември 2025 година повторно ќе се лета за Келн, линија што беше укината минатата година поради високите аеродромски такси, а од 6 април 2026 година, по едногодишна пауза, се враќа и линијата за Будимпешта.
