Изет Меџити најави тројно зголемување на капацитетите за предучилишно згрижување во Чаир
Кандидатот за градоначалник на Општина Чаир, Изет Меџити, на денешната јавна презентација во Чаир, пред граѓаните и медиумите, го промовираше новиот концепт за развој на предучилишниот систем во општината, нагласувајќи дека капацитетите за згрижување ќе се зголемат тројно во наредниот мандат, преку конкретни инвестиции во модерна и инклузивна инфраструктура за децата, се наведува во соопштението од ВРЕДИ.
„Чаир отсекогаш бил симбол на младоста, животот и новите почетоци. И денес, Чаир се гордее со највисока стапка на наталитет во државата. Тоа е нашата сила, нашата гордост, но пред сѐ – нашата најголема одговорност“, изјави Меџити.
Тој потенцираше дека силата на едно општество не се мери само со бројки, туку со вредностите, знаењето и мудроста што им се пренесуваат на новите генерации. Затоа, приоритет е поставувањето на систем на образование и грижа што започнува уште од најрана возраст.
„Планираните инвестиции се:
• Детската градинка ‘Бамби’ – веќе функционална, со капацитет од 360 деца, моментално најголемата во државата;
• Новата градинка ‘Снежана’ во Топанско Поле– која ќе се гради од темел, со капацитет од 300 деца;
• Новата градинка ‘Росица’ – исто така нов објект што ќе се гради од темел тука, со капацитет од 300 деца“, рече Меџити.
Овие три нови градинки ќе можат да згрижат 1.000 деца од предучилишна возраст, што речиси го достигнува бројот од 1.100 деца кои моментално се згрижени во седумте постојни градинки во Чаир.
„На овој начин, конечно го решаваме проблемот со недостиг на места во градинките. Секое дете во Чаир ќе има свое место. Никој нема да остане надвор“, додаде тој.
Концептот за предучилишно образование во новиот мандат на Меџити се базира на три основни столба:
1.Модерна инфраструктура – со безбедни, функционални и стимулативни простории за децата;
2.Еднаквост и инклузија – со посебни училници за деца со аутизам и посебни потреби;
3.Мотивиран и стручен кадар – воспитувачи кои работат со посветеност и љубов кон секое дете.
На крајот од своето обраќање, Меџити го оцени овој проект како долгорочна инвестиција во човечкиот капитал и конкретен чекор кон подобра иднина за семејствата во Чаир.
