ВИДЕО Oтпуштените службеници на ДУИ имале кревети во канцелариите во министерството за односи меѓу заедниците
По обвинувањата за дискриминација упатени од Демократската унија за интеграција, вицепремиерот и министер за односи меѓу заедниците Иван Стоилковиќ јавно реагираше преку социјалните мрежи, објавувајќи видео од просторија во рамки на министерството со кое раководи.
На својот фејсбук-профил, Стоилковиќ прикажа канцеларија за која тврди дека била користена од службеници кои неодамна биле отпуштени, а за кои наведува дека биле кадри на ДУИ. Објавата доаѓа откако опозициската партија јавно обвини дека во Министерството за односи меѓу заедниците се спроведува дискриминација, поради отпуштањето на седуммина Албанци во средата.
„Ова е канцеларијата во Министерството за односи меѓу заедниците, инаку претворена во ова што го гледате, во која ‘работеа’ вчера отпуштените службеници кои, по некоја случајност се од ДУИ. По документирањето на состојбата, истите се испратени да си спијат дома. Толку!“, напиша Стоилковиќ во описот на видеото.
Со оваа објава, министерот директно одговори на критиките од ДУИ, кои тврдат дека отпуштањата се политички и етнички мотивирани. Од Министерството засега нема дополнително соопштение во врска со наводите за дискриминација, ниту пак од ДУИ има реакција на последната објава на Стоилковиќ.
