(ВИДЕО) ДОДИК ДОБИ ЕДНА ГОДИНА ЗАТВОР: За Вучиќ оваа пресуда е срамна
Лидерот на босанските Срби, Милорад Додик доби една година затвор. За српските власти оваа пресуда е срамна.
Српскиот претседател Александар Вучиќ вечерва пристигна во Бања Лука за да му даде поддршка на претседателот на Република Српска Милорад Додик, кој денеска првостепено е осуден на една година затвор и има забрана за вршење на функцијата во период од шест години поради непочитување на одлуките на високиот претставник на меѓународната заедница. Вучиќ пресудата ја нарече антидемократска.
„Вечерва, кога е најтешко, одиме во Бања Лука за да му дадеме поддршка на нашиот народ, да се обидеме да влијаеме на сите одлуки што се носат, на крајот да доведат до смирување на ситуацијата и намалување на тензиите, а неговиот претседател, а Република Српска и неговиот претседател да бидат одбранети“, изјави Вучиќ.
Командантот на воените сили на Европската унија во Босна и Херцеговина (ЕУФОР), генерал-мајор Флориан-Мариан Барбу денеска изјави дека нема закани за мирот во земјата по првостепената пресуда против лидерот на босанските Срби, Милорад Додик. Русија смета дека со ова е загрозена стабилноста на Балканот.
Судот на Босна и Херцеговина донесе пресуда против претседателот на Република Српска, Милорад Додик, и вршителот на должноста директор на „Службен весник на РС“, Милош Лукиќ, кои беа обвинети за непочитување на одлуките на високиот меѓународен претставник Кристијан Шмит. Додик е прогласен за виновен, додека Лукиќ е ослободен.
Додик е осуден на една година затвор и шестгодишна забрана за вршење политички функции. Ова е првостепена пресуда, што значи дека постои можност за жалба. Обвинителството бараше максимална казна, која можеше да изнесува до пет години затвор и десетгодишна забрана за политичко дејствување.
