Величковски: Доста е од влечење „туѓ багаж“, време е за нов политички пресек!
Лидерот на Движењето за Нова Република, Ивон Величковски, вели новиот политички пристап е базиран на пресек со минатото и конкретни мерки против корупцијата, оценувајќи дека државата со години се врти во „затворен круг“.
Во гостување во емисијата „Ноќно студио“ на 4ТВ.мк, Величковски посочи дека формирањето на новото движење произлегло од потребата за одговорност и нов почеток.
„Мораше да помине период во кој што сопствената грешка… морав да ја ставам на увид на сите и таа одговорност се понесува“, изјави тој, потсетувајќи на неуспешниот самостоен настап во 2016 година, по што поднел оставка од лидерската позиција во Либералната партија.
Тој нагласи дека одлуката да се создаде нова политичка структура е резултат на несогласување со постојаното коалицирање.
„Инсистирањето да се оди цело време со некого во коалиција за мене не беше прифатливо… сакавме да направиме нешто ново и да не влечеме туѓ багаж“, рече Величковски.
Како клучна разлика, тој ја посочи конкретната политичка понуда, структурирана во девет приоритети, меѓу кои доминираат антикорупциските мерки.
„Инсистираме на законски решенија за ветинг… не само во правосудството, туку и во партиите, безбедносните органи, дипломатијата и медиумите“, истакна тој.
Дополнително, Величковски предложи отворање на досиејата, како и проширена конфискација на нелегално стекнат имот.
„Не може поранешни функционери обвинети за корупција да ги префрлаат парите на блиски и потоа да ги користат“, нагласи тој.
Тој побара и проширување на рестриктивните мерки кон лица кои се на „црни листи“ на меѓународни партнери.
„Проширувањето мора да ги опфати и лицата означени од САД, ОК и Канада“, рече Величковски, додавајќи дека ваквите механизми веќе даваат резултати во регионот.
Во продолжение целата емисија:
