Василевски за 4TV.mk: Иранската нуклеарна програма не е од вчера, корените се во 50-тите со помош на САД
Пензионираниот полковник и поранешниот шеф на военото разузнавање, Горан Василевски, во емисијата „Ноќно студио“ на 4TV.mk, анализираше дека е тешко со сигурност да се потврди до каде е стигнат воениот капацитет на Иран, но потсети дека основата на нивната програма е производ на западна поддршка.
Василевски потсетува дека иранското нуклеарно прашање има длабока историска генеза која датира уште од средината на минатиот век.
Тој посочува дека иранската нуклеарна програма не е нов феномен, ниту пак закана која настанала преку ноќ.
„Мора да кажеме дека нуклеарната програма во Иран започна уште од 50-тите години на минатиот век. Тоа не е нешто ново. Впрочем, во тие 50-ти и 60-ти години, токму со американска помош Иран почна да ја развива таа програма“, истакна Василевски.
Тој појаснува дека по низата политички пресврти – од соборувањето на шахот Реза Пахлави до Иранската револуција во 1979 година и доаѓањето на Хомеини на власт – поддршката од Западот престанува. Во тој момент, Иран го менува правецот и се свртува кон стратешка соработка со Русија и Пакистан.
На прашањето дали Иран навистина поседува нуклеарна бомба, поранешниот прв разузнавач вели дека таквите информации се најстрого чувана тајна во секоја држава.
„Многу е тешко да се каже до каде се стасани. Тоа се строго чувани тајни. На пример, за Израел официјално се тврди дека нема нуклеарен арсенал, додека многу извори велат дека располагаат со значителен арсенал. Не може со сигурност да се тврди“, вели тој.
Василевски потсети дека Меѓународната агенција за атомска енергија (МААЕ) долго време вршеше контроли и официјално утврди дека програмата се развива за цивилни, а не за воени цели. Сепак, со оглед на актуелните напади, дилемите за вистинската намена на овие капацитети остануваат во фокусот.
