Утре и во четврток се полагаат двата екстерни испита во августовската испитна сесија од државната матура

Двата екстерни испита во августовската испитна сесија од државната матура, за матурантите кои во јуни не ги положиле, ќе се полагаат утре и в четврток. Утре е тестирањето по мајчин јазик, а на 14-ти август е полагањето на изборниот екстерен испит.

Според податоците на Државниот испитен центар, за двата испитни дена вкупно се пријавени илјада 118 ученици. Испитите во августовскиот рок кандидатите ќе ги полагаат во простории на факултетите.

Министерството за образование и Државниот испитен центар минатата недела ги објавија резултатите од државната матура одржана во јуни. Просечната оценка на успехот од полагањето на двата екстерни испита во јунската сесија е 3,69 и е повисок од минатата година.