Јутјуберот Лазаров објави видео со извинување, но смета дека ова е хајка против него
По отстранувањето на скандалозниот поткаст со новинарот Драган Павловиќ Латас, Стефан Лазаров се јави со ново видео во кое се извинува и смета дека хајката е организирана за да биде уништен.
Во најновото видео „Извинете…“ вели дека се согласува со јавноста, и дека се во право.
„Се слагам со вас, во право сте и затоа сакам да ви се извинам за тоа што го чувте во подкасот, а јас како домаќин или водител дозволив тоа да се емитува. Дали станува за силување тоа ќе го оставам на вас. Меѓутоа, сакам да се извинам заради тоа што се добива една слика дека кај мене се промовираат такви работи. Прво, е жално што во оваа ситуација се гледа дека има сериозна позадина и станува збор за една сериозна оркестрирана хајка. Од едно мое смеење од 10 секунди, на анегдота кажана, да ме правите насилник, да ме правите силувач, да ме правите човек кој промовира такви работи на социјални мрежи, е бедно“, посочува тој.
Лазаров прашува како можело да видеото да биде објавено во вторник, а дури во недела нешто да се случи и истото да биде на мета во јавноста.
Тој упати и барање јавноста да процени за „позадината на луѓето кои го објавија ова, начинот на кој го објавија и кои институции први се јавија“.
„Не ми е поентата на ова видео да напаѓам, во ниту еден случај. Меѓутоа е жално како функционира оваа држава и е жално што се вадат од контекст многу работи. Многу луѓе тоа видео не го изгледаа до крај, и не ја изгледаа целата ситуација, и си формираа мислење и став врз основа на тоа што им беше пласирано. Во еден ден ситуацијата отиде на вести, денеска е главна дебатна тема и е стигнато до јавно обвинителство. И, денеска ме правите насилник и силувач, зошто Стефан се насмеал на некоја ситуација?“, вели тој во видеото.
Според него, видеото е тргнато зашто што смета дека таква содржина не смее да има на неговиот канал, но и многу од следбениците му пишале „тргни го така ќе покажеш дека имаш морални вредности“.
„Вчера беше поентата да се уништи Стефан за да се затскријат други работи. Јасно ми е дека многу луѓе сакаат да ми наштетат, јас сум млад многу неискусен за вакви работи. Во моментот со Латас јас не дослушнав што сакаше да каже, се насмевнав едноставно..“, вели тој
Инаку, досега свои свои реакции и осуди објавија повеќе организации и јавни личности, а ОЈО оформи и предмет.
