Уставен со 4 предмети за „Сејф сити“ – Костадиновски: Проектот докажа дека нашиот менталитет може брзо да се менува
Претседателот на Уставниот суд, Дарко Костадиновски, денеска информираше дека пред судот се веќе формирани четири предмети поврзани со системот „Безбеден град“ (Safe City).
Тој најави дека поради специфичноста и важноста на овој проект, кој претставува новина во државата, Судот ќе постапува со висок приоритет и брзина.
Иако не сакаше предвреме да ја прејудицира одлуката на Судот, Костадиновски упати јасна порака за општествената оправданост на видео-надзорот. Според него, мерките што ги предвидува овој систем се пропорционални на целта што се сака да се постигне – поголема безбедност и почитување на правилата.
„Овој проект на сите ни покажа дека нашиот менталитет може многу брзо да се смени и да се прилагоди на правила. Не сме безнадежен случај. Ако има вистинска подготвеност за почитување на владеењето на правото, имаме добра перспектива и иднина“, истакна Костадиновски.
Тој додаде дека примерот со „Сејф сити“ често го користи и на меѓународни конференции како аргумент дека граѓаните во Македонија се подготвени за развивање на уставната култура, доколку институциите постават јасни рамки и принципи.
