Уште две недели до летото, ќе се пушта дел од автопатот Кичево – Охрид
И покрај сложените теренски услови кај селото Ботун, од Јавното претпријатие за државни патишта (ЈПДП) уверуваат дека нема отстапување од најавениот рок за пуштање во употреба на делницата од Врбјани до Охрид од автопатот Кичево – Охрид, најавено за почетокот на летната сезона.
Од ЈПДП за МИА изјавија дека теренските активности се интензивирани и дека асфалтирањето е во тек на главната траса од Врбјани до Ботун. Акцентот е ставен на финализација на пристапните патишта и поставување заштитна инфраструктура.
„Забрзано тече изградбата на пристапните патишта од Врбјани преку Сливово, Арбиново, Издеглавје, до Песочани и Ново Село, како и кон селата Горенци и Оровник. На клучките Арбиново и Издеглавје се вршат завршни работи, поставуваме жичана и еластична ограда, а во Климештани е веќе пуштена под времен режим на сообраќај десната страна“, велат од ЈПДП.
Во тек се активности и кај клучките Требеништа и Свети Еразмо, а на делот од Подмоље до хотел Амбасадор се гради потпорен ѕид, столбови за натпатник и атмосферска мрежа. Во делот кон Охрид, пак, се подготвува теренот за асфалтирање и се поставува ограда во средишниот дел.
Критичната точка: Ботун и новите свлечишта
Како што беше најавено претходно од страна на вицепремиерот Александар Николоски, очекувањата беа дека пред летната сезона ќе бидат пуштени 40 километри од автопатот, но реализацијата ќе биде со исклучок на делот кај Ботун, каде има нови појави на свлечишта и геотехнички проблеми со косините.
Од ЈПДП информираат дека таму е во тек изработка на измена и дополна на основниот проект за трајна стабилизација на косини и усеци. Откако ќе се финализира проектната документација, ќе следи детална финансиска анализа за изведба.
Декада изградба, половина милијарда евра
Изградбата на автопатот Кичево – Охрид започна пред речиси 10 години, а според последниот анекс на Договорот (Анекс бр. 3), неговата вредност е проценета на 589 милиони евра.
Автопатот се смета за стратешки дел од коридорот што ги поврзува западниот и централниот дел на државата, а неговото финално завршување се очекува да значително го подобри поврзувањето, безбедноста и економската поврзаност на регионот.
