УПРАВНИОТ ОДБОР НА СТОПАНСКА БАНКА БИТОЛА СО НОВ ЧЛЕН – Александра Радевска се вклучи во тимот
Александра Радевска е нов член на Управниот одбор на Стопанска банка Битола.
Согласно правилата за работење на Македонска берза, за измените во Управниот одбор во банката се известува преку соопштение на берзата.
– Согласно Глава 6 од Правилата за котација, известуваме за следниве измени во органите на управување:
Врз основа на Одлука од Надзорен одбор бр. 02-3009/1/I-5 од 28 февруари 2023 година и Решение за издавање претходна согласност од Народна банка на Република Северна Македонија бр. 15-11519/11 од 7 јуни 2023 година, за член на Управен одбор на Стопанска банка а.д. Битола е именувана г-ѓа Александра Радевска – се наведува во соопштението на компанијата.
Согласно податоците објавени на веб страната на Стопанска банка Битола, Александра Радевска е дипломиран економист, магистер по економски науки од областа на сметководството и ревизијата.
Таа досега била член на Надзорниот одбор на Банката во неколку мандати од 2013 година.
Професионална кариера ја започнала во 2003 година во Друштвото за ревизија и консултантски услуги КПМГ Македонија ДОО Скопје како раководител на тим на ревизија, во периодот од декември 2009 година до март 2012 година работи како менаџер за ревизија во Друштвото за ревизија Грант Торнтон ДОО Скопје. Од 2012 година до март 2019 година е раководител на Секторот за ревизија во Друштвото за производство, трговија и услуги Орка Холдинг АД Скопје, а од март 2019 година е назначена за директор на Оддел за финансиски и сметководствени работи во истото друштво.
Поседува лиценца за работа за вршење работи на ревизија за овластен ревизор.
