УНИВЕРЗИТЕТОТ ВО ШТИП ВЕТУВА ЦЕЛОСНА СОРАБОТКА СО МВР И ОБВИНИТЕЛСТВОТО Ректоратот порачува дека чесните студенти нема да бидат засегнати
Универзитетот „Гоце Делчев“ во Штип најави целосна соработка со Министерството за внатрешни работи и надлежното обвинителство во истрагата за сомнежите за злоупотреба на електронскиот систем за оценки од страна на вработено лице. Од Ректоратот порачуваат дека имаат нулта толеранција за корупцијата и злоупотребите во академската заедница и дека нема да дозволат случајот да ја наруши вредноста на дипломите на илјадниците студенти кои чесно го завршиле своето образование.
– УГД овозможува целосна, неограничена соработка со МВР и надлежното обвинителство за брзо и целосно расчистување на случајот – велат од Ректоратот.
Оттаму нагласуваат дека ваквите случаи и постапките за нивно откривање се важни за обезбедување подобри услови за студирање, повисок квалитет и поголема објективност во академскиот процес.
– УГД има нулта толеранција за корупцијата и злоупотребата во академската заедница и сметаме дека ваквите и слични случаи се во насока да се обезбеди подобро, поквалитетно и пообјективно студирање – порачуваат од Ректоратот.
Универзитетот упатува порака и до студентите, наставниот и административниот кадар, како и до пошироката јавност, дека останува посветен на академските вредности, чесноста и вистинитоста. Во соопштението се посочува дека институцијата ќе продолжи активно да работи на спречување и сузбивање на сите појави што ги нарушуваат овие принципи.
Од УГД истакнуваат дека студентите и нивното образование остануваат во центарот на универзитетските активности, а истрагата нема да влијае врз редовното функционирање на институцијата.
– Нашите студенти и нивното образование остануваат во центарот на сите наши активности. Наставниот процес, академските обврски, научноистражувачката работа и меѓународната соработка со низа реномирани европски универзитети продолжуваат да бидат наш приоритет – се наведува во реакцијата.
Како јавна високообразовна институција, УГД уверува дека ќе продолжи да работи транспарентно и отворено, со почитување на институционалниот интегритет.
Особено ја нагласува потребата сомнежите поврзани со истрагата да не се прелеат врз угледот на студентите и вработените кои своите обврски ги исполнуваат чесно.
– УГД нема да дозволи каков било сомнеж да ги наруши трудот и вредноста на дипломите на илјадниците чесни студенти и вработени – се вели во соопштението.
Од Ректоратот повторно потенцираат дека Универзитетот има нулта толеранција за секој облик на корупција или злоупотреба на службената положба.
– Институционалниот интегритет и довербата на нашите студенти се пред сè – порачуваат од Универзитетот „Гоце Делчев“.
.
Извор: plusinfo.mk
