Украина е чекор поблиску до НАТО: Алијансата укина важен критериум
НАТО одлучи да се откаже од условот Украина да мора да учествува во Акциониот план за членство (МАП), кој поставува цели што треба да се постигнат пред да се приклучи на воената алијанса, изјави украинскиот министер за надворешни работи.
Шефот на украинската дипломатија, Дмитро Кулеба , еден ден пред самитот на НАТО рече дека таквиот потег ќе го скрати патот на Украина до членство во алијансата.
„По интензивните преговори, членките на НАТО постигнаа консензус за отстранување на МАП од патот на Украина за членство. Ја поздравувам оваа долгоочекувана одлука која ни го скратува патот кон НАТО“, напиша Кулеба на социјалната мрежа Твитер.
НАТО веднаш не ја коментираше изјавата на Кулеба.
Лидерите на алијансата се состануваат во вторник и среда во литванскиот главен град Вилнус, каде што ќе се обидат да ги надминат поделбите околу обидот на Украина да се приклучи на блокот.
Киев сака да добие јасна покана за членство во блокот по завршувањето на руската војна против Украина и се надева дека дотогаш ќе добие безбедносни гаранции.
Рускиот претседател Владимир Путин го наведе проширувањето на НАТО кон руските граници во последните две децении како причина за неговата одлука да испрати десетици илјади војници во Украина на 24 февруари 2022 година.
Се поголем број членки на алијансата го поддржаа британскиот предлог пред самитот да му се дозволи на Киев да ја прескокне програмата МАП, која поставува политички, економски и воени цели што земјите кандидати мора да ги исполнат и кои другите источноевропски држави мораа да ги исполнат пред да се приклучат на блокот.
Со таков потег, алијансата може да одговори на барањата да направи повеќе од декларацијата од самитот на НАТО во 2008 година, која ветуваше дека Украина на крајот ќе стане членка, но на Киев не му беше понудена вистинска покана или временска рамка.
„Ова е исто така најдобро време да се понуди јасност во врска со поканата за Украина да стане членка“, напиша Кулеба на Твитер.
