Украина: Десетици повредени и убиени по рускиот напад на Суми
Најмалку 24 лица загинаа, меѓу кои и едно дете, а 84 се ранети во напад со руски балистички проектили врз градот Суми во североисточна Украина во неделата, соопшти украинската Државна служба за вонредни состојби на Телеграма.
Меѓу повредените има и седум деца, пишуваат тие.
Државната служба за итни случаи претходно напиша дека луѓето се повредени „на сред улица, во автомобили, јавен превоз и домови“.
Русија го нападна центарот на Суми на верски празник, „кога луѓето одат во црква“, напиша украинскиот претседател Володимир Зеленски на Телеграма.
„Русија сака ваков вид терор и ја продолжува оваа војна. Без притисок врз агресорот, мирот е невозможен“, изјави тој.
Разговорите „никогаш не ги запреа балистичките ракети и воздушните бомби“, додаде тој.
Нападот се случил во дел од Украина каде што се верува дека руските сили подготвуваат голема офанзива бидејќи се обидуваат да окупираат што е можно повеќе украинска територија, пишува Џејмс Вотерхаус, дописник на Би-Би-Си од Киев.
Експлозијата била снимена на контролна камера на една од главните улици.
Запалени возила, тела на жртви и скршени дрвја може да се видат додека пожарникарите се обидуваат да го изгаснат пожарот.
Службите за итни случаи соопштија дека им се пружа помош на настраданите и дека психолозите ќе работат со погодените од нападот.
