Убави вести за акционерите на „Макпетрол“! За три месеци добивката е 2,78 милиони евра
Од дејноста во првиот квартал „Макпетрол“ генерирал профит во вредност од 1,4 милиони евра, а уште 1,6 милиони евра се нето финансиски приходи во периодот јануари – март
Најголемата македонската компанија за трговија на мало со нафтени деривати ги израдува своите акционери, а воедно внесе оптимизам и општо кај инвеститорите на Македонската берза.
„Макпетрол“ во својот единечен извештај за работењето во првиот квартал годинава објави умерен раст на приходите и раст на нето добивката.
Така за првите три месеци приходите од продажба на „Макпетрол“ изнесуваат 113,57 милиони евра и тоа е за 5 осто подобар резултат од истиот период лани. Во структурата на продажба како и секогаш досега убедливо доминира домашниот пазар со 111,91 милиони евра.
Вреди да се истакне и тоа што иако има мало учество во вкупната продажба сепак извозот на „Макпетрол“ во првиот квартал годинава е зголемен за 50 отсто во споредба со истиот период лани.
Паралелно со растот на продажба растат и оперативните расходи на компанијата и тоа за 6 отсто во споредба со лани. На крај на март годинава тие изнесуваат 112,46 милиони евра. Очекувано убедливо доминантно учество имаат трошоците за набавка на трговски стоки и за тоа во првите три месеци „Макпетрол“ платил 98,75 милиони евра.
За своите вработени „Макпетрол“ платил 7,23 милиони евра што е за 10 отсто повеќе од истиот период лани. Воедно тоа е втора најголема ставка во вкупните оперативни расходи на оваа компанија. „Макпетрол“ има над 1.800 вработени, а најголем дел од нив се ангажирани на 126 бензински станици на компанијата ширум Македонија.
Оперативната добивка на „Макпетрол“ во првиот квартал заради зголемените оперативни расходи е помала 27 отсто во споредба со истиот период лани. Таа изнесува 1,4 милиони евра.
Значајно позитивно влијание врз нето добивката на „Макпетрол“ имаат финансиските приходи на компанијата. Од таа ставка „Макпетрол“ нето (по одбивање на финансиските расходи н.з.) инкасирал 1,6 милиони евра.
Р.Ф.
