Базенот во СЦ „Борис Трајковски“ привремено затворен поради оштетување на таванот
По велигденските празници, базенот во рамките на Спортскиот центар „Борис Трајковски“ во Скопје е привремено затворен, откако дел од таванската конструкција – конкретно лајсна – се одвоила и паднала на плочките.
Раководството на спортскиот центар веднаш донело одлука да го затвори базенот за јавноста и пливачките клубови, со цел да се извршат неопходните градежни и безбедносни интервенции. Санацијата е најавена да трае околу еден и пол месец, по што базенот повторно ќе биде отворен за корисниците.
Zа САКАМДАКАЖАМ.МК директорот на СЦ „Борис Трајковски“ Даниел Апостоловски изјави дека немало опасност во моментот кога паднала лајсната оти немало посетители во базенот, ниту пак таа може да предизвика сериозни повреди. Вели дека проблемите се појавиле бидејќи реконструкцијата во 2010 не била целосна.
„Веднаш повикавме професори од Градежниот факултет кои извршија увид на целиот објект. Беше заклучено дека челичната носечка конструкција е добра, но бидејќи реконструкцијата не била целосна, односно не била согласно проектот, се појавуваат овие проблеми. Договоривме во наредниот месец и пол да се санира долниот внатрешен дел и да се постави заштитна мрежа. Со тоа, во текот на летото базенот ќе може да работи. А потоа, пред Нова година ќе извршиме целосно реконструкција на базенот и тогаш ќе биде затворен подолго време“, вели Апостоловски.
Базенот беше реновиран во 2010 кога на власт беше ВМРО-ДПМНЕ, а директор на објектот беше Ратко Капушевски.
Капушевски од минатиот месец е во притвор за случајот за злоупотреби во набавки на мазут и перење пари, со што е оштетен буџетот на државата за 167 милиони евра.
